Ekspert təhsil haqları barədə açıqlama verib

Sosial şəbəkələrdə dövlət sifarişi ilə ali təhsil müəssisələrinin bakalavriat və əsas (baza ali) tibb təhsili səviyyələrində hər bir təhsilalana düşən illik təhsil xərclərinin təhsil haqqı kimi təqdim olunması anlaşılmazlıq yaradıb.

“Xəbərburo” xəbər verir ki, məsələyə münasibət bildirən təhsil eksperti Kamran Əsədov bildirib ki, Baş Nazir Əli Əsədovun yeni qərarı təhsil haqlarının artırılması demək deyil:

“Təhsil haqları o qədər artırılmır. Qeyd olunan məbləğ break-even point (zərərsizlik nöqtəsi) və ya adambaşına düşən təhsil xərcidir.
Misal üçün, keçən il eyni cədvəldə Heykəltəraşlıq 6000 manat idi, amma abituriyent 4 jurnalında 2500 manat idi. Və ya 2019-cu ildə eyni cədvəldə dirijorluq 3900 manat idisə, abituriyent 4 jurnalında 2000 manat idi. Və ya Müalicə işi müvafiq cədvəldə 5400 manat idisə, abituriyent jurnalında 4500 manat idi.

Baş nazirin bugünkü qərarı təhsil haqqının artırılması demək deyil”.

Vurğulayaq ki, qərara görə ali təhsil müəssisəsi tərəfindən dövlət sifarişi ilə hər bir təhsilalana çəkilən faktiki illik xərc təsdiq edilmiş illik təhsil xərclərinin məbləğindən artıq olduğu halda, onun qalan hissəsi həmin ali təhsil müəssisəsi və ya onun tabe olduğu qurum ödəyir.