5 ölkənin ATƏT PA-dakı nümayəndə heyətinə məktub göndərilib

Məmmədzadə Zərintac 24/07/2020

24 iyulda Azərbaycanın ATƏT Parlament Assambleyasındakı (ATƏT PA) nümayəndə heyətinin rəhbəri və ATƏT PA-nın vitse-prezidenti Azay Quliyev ABŞ, Belçika, Böyük Britaniya, Fransa və İsveçin ATƏT PA-dakı nümayəndə heyətlərinin rəhbərlərinə məktub ünvanlayıb.

"Qafqazinfo"ya əsasən "XəbərBuro"  xəbər verir ki, A.Quliyev Ermənistanın 12 iyuldan başlayaraq Azərbaycan-Ermənistan sərhədində yerləşən Tovuz rayonu istiqamətində törətdiyi təxribatlar və yuxarıda adı çəkilən 5 ölkədə yaşayan Azərbaycan diasporu nümayəndələrinin Ermənistanın təcavüzünə qarşı təşkil etdikləri dinc nümayişlərə erməni millətçilərinin etdikləri hücumlar və zorakılıq faktları haqda məlumatlandırıb və zorakılığı nümayiş etdirən fotoşəkilləri onlara təqdim edib.

Azay Quliyev erməni diasporu üzvlərinin təşkilatlanmış qaydada Azərbaycanın xarici ölkələrdəki diplomatik nümayəndəliklərinin inzibati binalarına qarşı törətdikləri vandalizm faktlarını, həmçinin diplomatik missiya nümayəndələrinə hücumlar və dinc etiraz aksiyaları keçirən azərbaycanlılara qarşı fiziki güc tətbiq etdiklərini və onlara bədən xəsarəti yetirdiklərini nümayəndə heyətlərinin rəhbərlərinin diqqətinə çatdıraraq belə nifrət, təcavüz və zorakılıq cinayətlərinin yolverilməzliyini və onların yerli qanunvericilik, beynəlxalq hüquqla qadağan olunduğunu və ATƏT-in müvafiq prinsipləri ilə tam ziddiyyət təşkil etdiyini vurğulayıb.

Ölkəmizin ATƏT PA-dakı nümayəndə heyətinin rəhbəri xarici həmkarlarından azərbaycanlılara qarşı açıq cinayət törətmiş ermənilərin qanun qarşısında cavab vermələri məsələsini nəzarətdə saxlamağı xahiş edib və analoji cinayətlərin təkrarlanmasına yol verməmək istiqamətində parlament səviyyəsində də səylərin göstərilməsinin vacibliyini nümayəndə heyətləri rəhbərlərinin nəzərinə çatdırıb.

Azay Quliyev ATƏT PA-nın ATƏT-in Minsk Qrupu həmsədrlərinin fəallığının artırılması baxımından bütün imkanlarının səfərbər olunmasının əhəmiyyətini qeyd edərək Ermənistan-Azərbaycan münaqişəsinin beynəlxalq hüququn norma və prinsipləri, habelə Azərbaycan Respublikasının ərazi bütövlüyü, suverenliyi və beynəlxalq səviyyədə tanınan sərhədlərin toxunulmazlığı prinsipi, 1975-ci il Helsinki Yekun Aktı və BMT Təhlükəsizlik Şurasının 4 qətnaməsi çərçivəsində həlli istiqamətində Minsk Qrupu həmsədrlərinin daha fəal olmağa səsləyib.

Nümayəndə heyətlərinə göndərilən məktubların surəti ATƏT PA-nın prezidenti Georgi Sereteli və Baş katibi Roberto Montellaya da təqdim edilib.